MSME Briefing Bureau

નવીનતા, ગુણવત્તા અને વિશ્વાસે સ્વીડિશ બ્રાન્ડને પેઢીઓની ઓળખ બનાવી આપી

તમે ક્યારેય દુકાને જઈને સ્ટવ માંગ્યો છે કે પ્રાઇમસ? એક સમય એવો હતો, જ્યારે ગ્રાહક માટે પ્રેશરથી ચાલતો કેરોસીન સ્ટવ એટલે પ્રાઇમસ. બ્રાન્ડનું નામ જ પ્રોડક્ટની ઓળખ બની ગયું હતું. આ ઓળખ પાછળ માત્ર જાહેરાત નહોતી. ૧૮૯૨માં વિકસાવેલી નવી ટેક્નોલોજી, ધુમાડા અને કાળાશથી રાહત આપતી જ્યોત, વિશ્વભરમાં પહોંચાડતું વિતરણ અને મુશ્કેલ પરિસ્થિતિઓમાં સાબિત થયેલી વિશ્વસનીયતા—આ બધાએ મળીને પ્રાઇમસને પેઢીઓના મનમાં સ્થાન અપાવ્યું. આ એક સ્ટવની નહીં, નવીનતા અને બ્રાન્ડ ઘડતરની કહાની છે. સમજવા જેવી એક બિઝનેસ કહાની!

સમસ્યામાંથી જન્મેલી નવીનતા

વાત છે ૧૮૯૨ની. સ્વીડનના સ્ટોકહોમમાં એફ. ડબલ્યુ. લિન્ડક્વિસ્ટ અને જે. વી. સ્વેન્સને વાટવાળા કેરોસીન સ્ટવની સમસ્યાનો ઉકેલ શોધ્યો. એ સ્ટવ ધુમાડો કરતા, વાસ ફેલાવતા અને વાસણો તથા રસોડાની દીવાલો કાળી કરતા.

બંનેએ પ્રેશરથી ચાલતી, વાટ વગરની બ્રાસ બર્નર ટેક્નોલોજી વિકસાવી. તેમાં કેરોસીનને દબાણથી બર્નર સુધી પહોંચાડી, વરાળમાં રૂપાંતરિત કરીને સ્વચ્છ, તેજસ્વી વાદળી જ્યોત મેળવવામાં આવતી હતી.

આ નવી પ્રોડક્ટનું નામ રાખવામાં આવ્યું પ્રાઇમસ, જેનો લેટિન અર્થ થાય છે ‘પ્રથમ’.

નવીનતાને બજાર સુધી પહોંચાડ્યું

માત્ર ઉત્તમ પ્રોડક્ટ બનાવી દેવાથી વૈશ્વિક બ્રાન્ડ ઊભી થતી નથી. પ્રાઇમસને આંતરરાષ્ટ્રીય બજારો સુધી પહોંચાડવામાં સ્વીડનની B.A. Hjorth & Co. (બાહકો)ની વિતરણ વ્યવસ્થાએ મહત્ત્વની ભૂમિકા ભજવી.

આ રીતે પ્રાઇમસ સ્વીડનની બહાર પણ પહોંચ્યું અને અનેક દેશોમાં ગ્રાહકોની ઓળખ બન્યું.

વિશ્વાસની કસોટી: દક્ષિણ ધ્રુવથી એવરેસ્ટ સુધી

પ્રાઇમસની વિશ્વસનીયતાને માત્ર જાહેરાતોથી નહીં, પરંતુ મુશ્કેલ પરિસ્થિતિઓમાં તેના વાસ્તવિક ઉપયોગથી ઓળખ મળી.

૧૯૧૧માં રોઆલ્ડ અમુન્ડસનની દક્ષિણ ધ્રુવની ઐતિહાસિક સફરમાં પ્રાઇમસનો ઉપયોગ થયો. ૧૯૫૩માં એવરેસ્ટ સર કરનાર એડમન્ડ હિલેરી અને તેનઝિંગ નોર્ગેએ પણ પોતાના અભિયાનમાં પ્રાઇમસનો ઉપયોગ કર્યો.

બરફીલા પ્રદેશોમાં રસોઈ બનાવવા અને બરફ ઓગાળવા માટે ઉપયોગી સાબિત થયેલી આ પ્રોડક્ટે સામાન્ય ગ્રાહકોમાં પણ વિશ્વાસ ઊભો કર્યો.

ટકાઉપણું અને રિપેર કરવાની સુવિધા

પ્રાઇમસની બ્રાસ બાંધણી અને તેના બદલી શકાય તેવા સ્પેરપાર્ટ્સે તેની ઉપયોગિતા વધારી. પંપના વોશરથી લઈને બર્નરની સફાઈ માટેની નાની સોય સુધી, જરૂરી ભાગોની જાળવણી અને રિપેર શક્ય હતાં.

એટલે નાની ખામી સર્જાય તો આખી પ્રોડક્ટ બદલવાની જરૂર પડતી નહોતી.

સમય જતાં રસોડામાં LPG અને ઇલેક્ટ્રિક ઉપકરણોનું ચલણ વધ્યું અને પરંપરાગત બ્રાસ પ્રેશર સ્ટવનું સ્થાન ઘટ્યું. છતાં, ભારતમાં પ્રાઇમસ શબ્દની ઓળખ પેઢીઓ સુધી ટકી રહી.

સ્થાપકો માટે પ્રાઇમસની પાંચ શીખ

1. નવીનતા: ગ્રાહકની સાચી સમસ્યાનો ઉકેલ આપો.
2. ગુણવત્તા: પ્રોડક્ટની ગુણવત્તામાં સાતત્ય રાખો.
3. વિશ્વસનીયતા: વાસ્તવિક કસોટીમાં તમારી પ્રોડક્ટ સાબિત કરો.
4. રિપેરેબિલિટી: ગ્રાહકને લાંબા સમય સુધી ઉપયોગની સુવિધા આપો.
5. બ્રાન્ડ ઓળખ: એવી વિશિષ્ટતા ઊભી કરો કે સ્પર્ધકો માટે તમારી ગુણવત્તા અને ઉપયોગિતાની બરાબરી કરવી સહેલી ન રહે.

માત્ર પ્રોડક્ટ વેચવાથી બિઝનેસ વધે; નવીનતા, ગુણવત્તા અને ગ્રાહકના વિશ્વાસથી બ્રાન્ડ બને છે. પ્રાઇમસ તેની એક ઐતિહાસિક મિસાલ છે.